भारतमा चिप फ्याक्ट्री खोल्न ताइवानी फक्सकन र वेदान्तको साझेदारी, १० अर्ब डलर लगानी हुने

काठमाडौं। भारतमा फक्सकन र वेदान्तको साझेदारीमा भारतकै पहिलो चिप फ्याक्ट्री निर्माण गरिने भएको छ। यसका लागि यी दुई कम्पनीले साझेदारी गर्दै १९ अर्ब डलर लगानी गर्ने घोषणा गरेका छन्।

सवारी साधन र इलेक्ट्रोनिक्स सामानमा सेमीकन्डक्टर चिप प्रयोग हुन्छ, जसको उत्पादन पर्याप्त नहुँदा संसारभर सवारी कम्पनीहरु समय समयमा प्रभावित हुँदै आएको छ। ताइवानी फर्म फक्सकन र भारतीय कम्पनी वेदान्तले भारतमा चिप उत्पादनलाई बढावा दिन उक्त साझेदारी गरिएको जनाएका छन्।

भारतका प्रधानमन्त्री नरेन्द्र मोदीको सरकारले लगानीकर्तालाई आकर्षित गर्न गतवर्ष १० अर्ब डलरको प्याकेज घोषणा गरेको थियो। गुजरातमा बनाइने चिप उत्पादन प्लान्टलाई सुविधा दिने बाचा सरकारको छ।

वेदान्तका अध्यक्ष अनिल अग्रवालले उद्योगका लागि अझै पनि गुजरातको राजधानी अहमदाबाद नजिकै उपयुक्त हुने लगभग ४०० एकड जमिनको खोजीमा रहेको बताएका छन्। तर भारतीय र विदेशी कम्पनीहरूले विगतमा परियोजनाका लागि ठूलो भूभाग प्राप्त गर्न संघर्ष गर्दै आएका छन्।

मोदीको हस्ताक्षर 'मेक इन इण्डिया' नीतिको बावजुद विश्वव्यापी उत्पादकहरूलाई आकर्षित गर्न डिजाइन गरिएको योजनामा अझै चुनौतीहरू बाँकी नै रहेको विज्ञहरू बताउँछन्।

यस परियोजनाले राज्यमा एक लाख जनाका लागि रोजगारी सिर्जना गर्ने बताइएको छ। समझदारी अनुसार दुई वर्षभित्रमा चिप्स उत्पादन सुरु गर्ने अपेक्षा छ। अग्रवालले ट्वीटमा भारतको आफ्नै सिलिकन भ्याली अब एक कदम नजिक रहेको बताएका छन्।

भारतले आफ्नो प्राविधिक उद्योगलाई सुधार गर्न ३० अर्ब खर्च गर्ने बाचा गरेको छ। सरकारले ताइवान, अमेरिका र चीन जस्ता ठाउँहरूमा चिप उत्पादकहरूमा कम निर्भर हुनको लागि चिप निर्माताहरूका लागि प्रारम्भिक १० अर्ब डलरभन्दा बढी प्रोत्साहनहरू विस्तार गर्ने बताएको छ।

वेदान्त भारतमा चिप प्लान्ट निर्माण गर्ने योजनाको घोषणा गर्ने तेस्रो कम्पनी हो।