नवलपरासी-२ मा तीन दशकपछि कांग्रेसले भत्कायो एमालेको विरासत, विष्णु कार्की विजयी

नवलपुर।  नवलपुर-२ (नवलपरासी (बर्दघाट-सुस्तापूर्व) मा कांग्रेसले एमालेको तीन दशक लामो विरासत भत्काएको छ। सत्ता गठबन्धनका दलको साथ पाएर उम्मेदवार बनेका कांग्रेस नेता विष्णु कार्कीले एमालेको ३० वर्षे विरासत भत्काएका हुन्।

गत आइतवार सम्पन्न प्रतिनिधिसभा तथा प्रदेशसभा निर्वाचनको अन्तिम मतपरिणाम आज सार्वजनिक हुँदा कांग्रेसका उम्मेदवार कार्कीले एमालेका तिलबहादुर महत क्षेत्रीलाई २ हजार २१ मतान्तरले पराजित गरे। यहाँबाट निर्वाचित कार्कीले ३६ हजार १ सय ४ मत प्राप्त गर्दा उनका निकटतम् प्रतिस्पर्धी एमालेका क्षेत्रीले ३४ हजार ८३ मत पाएका छन्।

नवलपुर-२ बाट २०४८ को निर्वाचनमा एमालेका उम्मेदवार मोजीलाल थनेत थारू निर्वाचित भएका थिए। त्यसैगरी, २०५१ को मध्यावधि निर्वाचनमा एमालेका चन्द्रमणि खराल यसै क्षेत्रबाट निर्वाचित भएका थिए। विसं २०५६ मा भएको आमनिर्वाचनमा एमालेका तर्फबाट पुनः मोजीलाल थनेत थारू निर्वाचित भए।

पहिलो संविधानसभा सदस्यको निर्वाचन २०६४ मा एमाले तेस्रो शक्ति बन्दासमेत यस क्षेत्रबाट एमालेका उम्मेदवार कृष्णप्रसाद पौडेल निर्वाचित भएका थिए। त्यसैगरी, दोस्रो संविधानसभा सदस्यको निर्वाचन २०७० मा एमालेकै जीवन श्रेष्ठ तथा आमनिर्वाचन २०७४ मा एमालेका तिलबहादुर महत क्षेत्री यहाँबाट निर्वाचित भएका थिए।

उनै क्षेत्री अहिले संयुक्त लोकतान्त्रिक-वाम गठबन्धनका उम्मेदवार कार्कीसँग दुई हजारभन्दा बढी मतान्तरले पराजित भए। एमालेको तीन दशकभन्दा लामो विरासत भत्काउनु सानो उपलब्धि नभएको कांग्रेसका जिल्ला सभापति महेन्द्रध्वज जिसी बताउँछन्।

‘यहाँ एमालेको राम्रो प्रभाव रहेको छ, प्रदेशको दुवै क्षेत्र एमालेले जितेको अवस्थामा सङ्घ हामीले जित्नु ठूलो उपलब्धि हो,’ जीसीले भने, ‘यो जितलाई आगामी दिनमा कायम राख्नका लागि हामीलाई अझ बढी चुनौती थपिएको छ।’

यहाँको दुवै प्रदेशसभामा एमालेका उम्मेदवारले ठूलो मतान्तरले जित निकालेका थिए। प्रदेशमा जितेको पार्टी संघमा हार्दा सांगठनिकरूपमा एमालेलाई धक्का लागेको पार्टीका जिल्ला अध्यक्ष रोशनबहादुर गाहामगरले बताए।

‘पार्टीले नसोचेको निर्वाचन क्षेत्रमा हार व्यहोरेको छ,’ मगरले भने, ‘हामी यहाँ के कारणले हार्‍यौं भन्ने विषयमा पार्टीमा छलफल गर्नेछौं।’ सांगठनिकरुपमा बलियो भएको क्षेत्रमा पनि हार्नुको कारण खोतलिने उनको भनाइ छ।

नवलपुर-२ मा अघिल्लो निर्वाचन २०७४ मा कार्की १ हजार ३ सय ३ मतान्तरले क्षेत्रीसँग पराजित भएका थिए। तत्कालीन समयमा महतले ३९ हजार ५३ मत प्राप्त गर्दा कार्कीले ३७ हजार ७ सय २० मत प्राप्त गरेका थिए। रासस