लमजुङको भुजुङमा पर्यटकका लागि भीरमह सिकार, हनि हन्टर रियल हिरो हुन्ः क्याप्टेन लामा

काठमाडौं। लमजुङको भुजुङमा भीर मह काढेर साहसिक मनोरञ्जन गरिएको छ। काठमाडौबाट पाहुना लगेर पर्यटन प्रवर्द्धनका लागि कार्यक्रम स्पार्क एड्भेन्चर ग्रुपले आयोजना गरेको हो।

'हनी हन्टीङ' सँगै भुजुङ गाउँ देखाउने र होमस्टे प्रवर्द्धनलक्षित कार्यक्रममा पुगेको टोलीका क्याप्टेन विजय लामाले भीरमह सिकारीलाई 'रियल हिरो' मान्नुपर्ने बताएका छन्। भीरमह काढ्ने काम साहसिक भएकाले उनले यस्तो बताएका हुन्।

मुलुकका ख्यातिप्राप्त कलाकार, पाइलट, डाक्टर, पत्रकार, लेखक, प्राध्यापक, इन्जिनियर, वकिल, खेलाडी, सुरक्षा अधिकारी, व्यापारीलगायत करिब २ सय जनाको टोलीलाई काठमाडौंबाट भुजुङ लगिएको थियो। टोलीका लामाले उपाधि पाएको जनाइएको छ।

आन्तरिक पर्यटन प्रवर्द्धन गर्ने उद्देश्यले लमजुङको भुजुङ गाउँमा सम्पन्न स्पार्क एड्भेन्चर-२०२२ अन्तर्गत अहिलेसम्मकै ठूलो समूहले हनि हन्टिङ (मह सिकार) अवलोकन गरेको जनाइएको छ।

कलाकार राजेश हमालले पहिलोपटक होमस्टेको अनुभव लिने क्रममा भुजुङ गाउँको बसाईले मोहित बनाएको बताएका छन्। कलाकार वर्षा सिवाकोटी, विपिन कार्की लगायतले यात्रा रोमाञ्चक हुनुका साथै आफैं गएर भीरमा मह काढौं जस्तो उत्साह पैदा गरेको बताएका छन्।

गत बिहीबार बिहान काठमाडौंबाट गएको टोलीले शुक्रबार भुजुङको घिम्चे भीरमा मह काढेको अवलोकन गरेको हो। पाहुना टोली क्व्होलासोंथार पुग्नुको मुख्य उद्देश्य मुलुकको आन्तरिक पर्यटन प्रवर्द्धन रहेको स्पार्क ग्रुपका सीइओ रोशन घिमिरेले बताए।

कार्यक्रममा कलाकार हमाल, गायक रामकृष्ण ढकाल, वरिष्ठ रंगकर्मी सुनिल पोखरेल, क्याप्टेन लामा, कलाकार विपिन कार्की, वर्षा सिवाकोटी, मधुसुदन पाठक, तेक्वान्दो खेलाडी दीपक विष्ट, डा. लोचन कार्कीसहितको टिम भुजुङ पुगेको स्पार्क समूहका इभेन्ट म्यानेजर अमरदीप भट्टराईले जानकारी दिए।

कार्यक्रममा काठमाडौंबाट बेंसीसहर हुँदै भुजुङ गाउँ पुगेको टोलीले भुजुङमा स्थानीय संस्कृतिको अवलोकन, भीरमह सिकार स्थलमा पुगेर अवलोकन र होमस्टेमा खाना खाएर घलेगाउँ हेर्दै बेंसीसहर फर्केको भट्टराईले बताए।

भुजुङमा करीब ४ सय घर एकैठाउँमा छन्। पहिले एउटै गाउँ र एउटै गाविसले चिनिएको भुजुङ अहिले क्व्होलासोंथारको एउटै वडामा पर्छ। समुद्री सतहदेखि १ हजार ६ सय ५० मिटर उचाइको यो गाउँ लमजुङ सदरमुकाम बेंसीसहरदेखि ३६ किलोमिटर उत्तरपश्चिममा पर्छ।