सुनको मूल्य तोलाको १ लाख, तीन दिनमा ५ सय घट्यो, चाँदी प्रतितोला १३ सय ९० मा स्थिर

काठमाडौं। साताको तेस्रो दिन मंगलबार पनि सुनको मूल्य घटेको छ। नेपाल सुनचाँदी व्यवसायी महासंघका अनुसार सोमबारको तुलनामा मंगलबार सुन तोलामा २०० रुपैयाँले घटेको हो।

महासंघका अनुसार मंगलबारका लागि सुनको कारोबार मूल्य प्रतितोला १ लाख रुपैयाँ निर्धारण गरिएको छ। सोमबार तोलाको १ लाख २०० रुपैयाँमा खरिदबिक्री भएको थियो भने आइतबार १ लाख ५०० रुपैयाँ थियो। आइतबारका तुलनामा मंगलबार तोलामा ५०० रुपैयाँ घटेको छ। 

सुनको मूल्य ६ महिनापछि गत सातादेखि फेरि एक लाख पुगेको हो। दुई दिनको गिरावटले सुनको मूल्य क्रमिक घट्न सक्ने संकेत अन्तर्राष्ट्रिय बजारले गरे पनि चाँदीको मूल्य अस्वाभाविक तवरले बढेको छ।

मंगलबार चाँदीको मूल्य भने १३ सय ९० रुपैयाँ प्रतितोलामा स्थिर छ। सोमबार पनि चाँदीको कारोबार सोही मूल्यमा भएको थियो। आइतबार तोलाको १४ सय पुगेको थियो। त्यसमा १० रुपैयाँ घटेर सोमबार मूल्य निर्धारण भएको थियो।

अन्तर्राष्ट्रिय बजारमा सोमबार प्रतिऔंस १७८७.४४ डलरमा कारोबार भएको सुनको मूल्य घट्दै मंगलबार प्रतिऔंस १७८२.९७ डलर छ।

सुनका तुलनामा चाँदीको कारोबार मूल्य बलियो देखिएको छ। सोमबार प्रतिऔंस २३.२९ डलरमा कारोबार भएको चाँदी बढेर प्रतिऔंस २३.४२ डलर पुगेको छ।