काठमाडौं। फिफा विश्वकपमा वान एक्सबेटबाट सट्टेबाजी गर्ने एक जना पक्राउ परेका छन्। महोत्तरीको महोत्तरी गाउँपालिका-१ का आदर्श ठाकुरलाई प्रहरीले ललितपुरको सानेपाबाट पक्राउ गरेको हो।

फिफा विश्वकप-२०२२ लगायत अन्तर्राष्ट्रिय खेल तथा गतिविधिहरुमा सट्टेबाजी गर्न प्रयोग हुने बेटिङ एप्लिकेसन वान एक्सबेटमार्फत सट्टेबाजी लगाउने रकम संकलन गर्ने गराउने कार्यमा सक्रिय रहेको सूचनाको आधारमा मंगलवार उनलाई पक्राउ गरिएको ललितपुर प्रहरीले जनाएको छ।

ठाकुरले विगत ८ महिनादेखि सट्टेबाजी एजेन्टको रुपमा काम गरेको र विभिन्न व्यक्तिको नागरकिताको प्रतिलिपि प्रयोग गरी फरक-फरक सिमकार्ड निकालेको प्रहरी अनुसन्धानमा खुलेको छ। उनको साथबाट प्रहरीले एनसेल र स्मार्ट कम्पनीका ९४ थान सिमकार्ड बरामद गरेको छ।

ठाकुरले अहिलेसम्म विभिन्न बैंकमार्फत सट्टेबाजी गर्ने क्रममा २ करोड २ लाख ८४ हजार ४४८ रुपैयाँ वालेटबाट रकमान्तर गरेको अनुसन्धानमा खुलेको छ। प्रहरीले अहिले उनले प्रयोग गर्ने डिजिटल वालेटहरु रोक्का राखेको जनाएको छ।