काठमाडौं। पुल निर्माणका काम अघि बढाउन नारायणगढ-मुग्लिन सडक खण्डमा दैनिक सवारी आवागमन ४ घन्टा रोकिने भएको छ। आगामी पुस ५ देखि एक महिनासम्मका लागि बिहान ११ देखि ३ बजेसम्म सवारीसाधन संचालनमा रोक लगाइने भएको छ।

आयोजनाले मंगलबार एक सूचना जारी गर्दै नारायणगढ-मुग्लिन सडकखण्डमा बन्ने ४ वटा पुलहरु निर्माणका लागि पुस ५ गतेदेखि एक महिनासम्मको लागि दैनिक ४ घण्टा सवारीसाधानको आवतजावतमा रोक लगाइने जनाइएको छ।

आयोजनाका अनुसार राजमार्ग बिहान ११ बजेदेखि ३ बजेसम्म बन्द हुनेछ। चारवटा पुलहरु निर्माणको लागि राजमार्ग दैनिक ४ घन्टा बन्द गरिने भएको हो। जसमा सिमलताल पुल, कालीखोला पुल, तुइनखोला पुल र चिसेन्जी खोला पुल निर्माण गर्न लागिएको छ।

आयोजनाका अनुसार यो स्थानमा निकै नै कठिन किसिमको भौगोलिक बनावट रहेका कारण सडक सुरक्षालाई ध्यानमा राखेर सो स्थानहरुमा एप्रोच रोड तथा पुल निर्माणका लागि पहाड कटानको काम गर्न यस्तो व्यवस्था गरिएको हो।

सो अवधिभर सवारीसाधनहरुलाई यो स्थानहरुमा रोक्ने व्यवस्था मिलाइएको आयोजनाले जनाएको छ। नारायणगढ तर्फबाट छिर्ने यात्रुवाहक सवारी बस, मिनीबस, माइक्रो जुगेडीसम्म, मिनीबस, माइक्रो बस, साना सवारीसाधनहरु ११ बजेपछि पन्थकिलो बजारदेखि जुगेडीसम्म रोकिनेछन्।

यस्तै मुग्लिन तर्फबाट छिर्ने यात्रुवाहक सवारी बस, मिनी बस, माइक्रो जुगेडीसम्म बिहान ११ बजेदेखि रोकिने छन्।

यसैगरी काठमाडौं  तर्फबाट आउने सवारीसाधनलाई मुग्लिन बजारदेखि मनकामना केबलकार गेटसम्म र पोखरातर्फबाट आउने सवारीसाधनहरुलाई बेनीटारदेखि पावरहाउससम्म बिहान १०:५५ बजे रोकिने छ।

यस्तै मालवाहक सवारी ट्रक, लरी ट्रेलर, ट्रिपर, ट्यांकर, भारी सवारी नारायणगढबाट आउने सवारीलाई भतेरी जंगलदेखि रामनगरमा रोकिने व्यवस्था गरिएको छ। यस्तै काठमाडौंबाट आउने मालवाहक सवारी साधनलाई लेवाटारमा र पोखरातर्फबाट आउने मालवाहक सवारी साधनहरुलाई आँबुखैरनीमा बिहान १०:४५ बजे रोकिने छन्।

आयोजनाका अनुसार यी स्थानमा रोकिएका सबै सवारी साधनहरुलाई दिउँसो ३ बजे मात्र छाडिने छ। सो अवधिभर वैकल्पिक सडक प्रयोग गर्न मिल्ने सवारी साधनहरूले सोही बमोजिम सवारी चलाउन सक्ने आयोजनाले जानकारी दिएको छ।