जनकपुरधाम। नेपालतर्फ साइकलमा आइरहेका एक भारतीय नागरिक १९ किलो चाँदीसहित पक्राउ परेका छन्। धनुषाको जटही नाकाबाट भारतबाट नेपालतर्फ आइरहेको अवस्थामा सशस्त्र प्रहरीले उनलाई पक्राउ गरेको हो।

पक्राउ पर्नेमा भारत बिहारको मधुवनी जिल्लाको सुट्ठी गाउँका ५० वर्षीय चन्द्रकान्त झा रहेको सशस्त्र प्रहरी बल जटहीका प्रहरी नायब उपरीक्षक निर्मल खडकाले बताए। 

जटही नाका भएर साइकलमा नेपाल आएका उनको जीउमा चाँदीको पोकाहरु बाँधेर ल्याएको भेटिएको खड्काले जानकारी दिए। बरामद १९.४१७ केजी चाँदी १९ लाख ६४ हजार ३ सय ४० रुपैयाँ बराबरको छ।  

पक्राउ परेकाको साथबाट एउटा साइकल, मोबाइल र घडीसमेत प्रहरीले नियन्त्रणमा लिएको छ। चाँदी र पक्राउ परेका भारतीय नागरिकलाई भन्सार कार्यालयमा बुझाइएको सशस्त्र प्रहरीले जनाएको छ।