काठमाडौं। राइड सेयरिङ प्लेटफर्म पठाओ र डिजिटल वालेट छिटो पैसाबीच सहकार्यको सम्झौता भएको छ।

पठाओका सेवा प्रयोगकर्तालाई विना झन्झट रकम भुक्तानीका लागि यो सम्झौता गरेको जनाइएको छ।

सम्झौतापत्रमा पठाओ नेपालका निर्देशक शशांक शमशेर थापा र छिटो पैसा (डिजिटल वालेट) का सहसंस्थापक प्रवीन रेग्मीले हस्ताक्षर गरेका हुन्।

छिटो पैसा वालेट एप प्रयोग गर्दा सेवाग्राहीले पठाओका सजिलै राइडर, फुडम्यान र क्याप्टेनलाई रकम भुक्तानी गर्न सक्नेछन्।

राइडर, फुडम्यान र क्याप्टेनले पनि सोही एपबाटै पठाओलाई दिनुपर्ने रकम भुक्तानी गर्न सकिने व्यवस्था गरिएको जनाइएको छ।

चार वर्षअघि बाइकमा राइड सेयरिङमार्फत सेवा सुरू गरेको पठाओले काठमाडौं र चितवनमा सेवा दिँदै आएको छ।