काठमाडौं। तरकारीको थोक बजारमा हिउँदे उत्पादन भित्रिँदै गर्दा काठमाडौंमा आलु विस्तारै सस्तिदै छ। एक महिना अघिमात्रै  थोकमा ७२ रुपैयाँ प्रतिकिलो पुगेको आलुको भाउ घट्दै ५३ रुपैयाँमा आइपुगेको कालिमाटी फलफूल तथा तरकारी बजार विकास समितिले जनाएको छ।

यो सँगै खुद्रा बजारमा पनि अघिल्लो महिना प्रतिकिलो १ सय रुपैयाँसम्म परिरहेको आलुको भाउले उपभोक्तालाई केही राहत भएको छ। खुद्रा बजारमा हाल उपभोक्तालाई आलु प्रतिकिलो अधिकतम ६० देखि ७० रुपैयाँसम्ममा बिक्री भइरहेको व्यापारी बताउँछन्। उनीहरुका अनुसार नयाँ आलु बजारमा भित्रिदै गर्दा भाउ अझ घट्ने अनुमान गर्न सकिन्छ।

काठमाडौंको खुद्रा बजारमा हाल उपभोक्तालाई पुरानो आलु प्रतिकिलो ६० र नयाँ प्रतिकिलो ७० रुपैयाँ परिरहेको छ। व्यवसायीहरुका अनुसार यो मूल्य गत महिनाको तुलनामा सस्तो भएको हो।

कालिमाटी फलफूल तथा तरकारी बजार विकास समितिका सूचना अधिकारी विनय श्रेष्ठका अनुसार गत वर्षको यही बेलाका तुलनामा आलुको भाउ धेरै घटिसकेको छैन। एक महिना अघिको भाउभन्दा हाल करिब ३० प्रतिशतले घटेको छ। 

बजारमा नयाँ आलु भित्रिएसँगै भाउ घट्नु स्वाभाविक भएको उनी बताउँछन्। ‘नयाँ आलुको सिजन सुरु पनि भयो। लोकल आलु नै आइरहेको छ। भारतमा पनि आलुको सिजन छ। साथै भारतीय आलुमा पनि कोल्डस्टोरमा राख्नेको पनि यो क्लियरेन्सको समय हो।’ भारतीय मण्डीमा  कोल्डस्टोरका आलु पुराना हटाउने बेला पनि सस्तिने गरेको छ।

काठमाडौं उपत्यकाको साँखु, काभ्रेको नाला लगायतका क्षेत्रबाट नयाँ आलु आएपछि मूल्य सस्तिएको उनले बताए । 'यो महिनाभरि २९ सय १६ टन आलु आएको छ। यसमध्ये १५ सय ३४ टन भारतीय हो। काभ्रेबाट ९ सय ४६ टन आएको छ। ३ सय ९३ टन काठमाडौंबाट आएको छ र बाँकी अरु जिल्लाबाट आएको छ। करिब ५३ प्रतिशत आलु भारतबाट आएको देखिन्छ,’ उनले जानकारी दिए।

वैशाखदेखि वर्षायामसम्म आलु उत्पादनका लागि अफ सिजन हो। उत्पादन कम हुने बेला आलुको कारोबार मूल्य बढ्ने गरेको छ। तर गतवर्ष यतिबेला थोक बजारमा नेपाली रातो आलुको मूल्य औसतमा ४६ रुपैयाँ थियो। त्यसको तुलनामा हालको मूल्य सस्तिएको तथ्यांकले देखाउँदैन। गत वर्षको भन्दा यो वर्ष मूल्य करिब १५ प्रतिशतले बढेको छ। 

यो वर्ष पनि आलुको मूल्य असोज र कात्तिक मध्यसम्म निकै बढेको थियो। यस बीच थोकमा नै किलोको ९९ रुपैयाँसम्म परेको थियो। कात्तिक मध्यबाट भने मूल्य क्रमिक ओरालो लागेको छ।