काठमाडौं। एक महिना अघिमात्रै थोक बजारमा औसत ६६ रुपैयाँ पर्ने सेतो लोकल मूलाको मूल्य घट्दै करिब प्रति किलो २८ रुपैयाँमा झरेको छ।कालिमाटी फलफूल तथा तरकारी बजार विकास समितिका अनुसार काठमाडौंमा तरकारीको थोक बजारमा हिउँदे उत्पादन भित्रिने क्रम जारी छ। जसका कारण लोकल मूलाको मूल्यमा पनि गिरावट देखिएको समितिको भनाइ छ। 

कालिमाटी फलफूल तथा तरकारी बजार विकास समितिका सूचना अधिकारी विनय श्रेष्ठका अनुसार मूलाको भाउ अझै घट्ने क्रममा नै छ। गत महिनाको तुलनामा यो महिना लोकल सेतो मूलाको भाउ करिब ६० प्रतिशतले घटेको छ। तर गत वर्षको यही बेलाको तथ्यांक हेर्दा मूलाको मूल्य यथावत नै रहेको छ। एक वर्ष यघि थोक बजारमा सेतो मूलाको मूल्य २९ रुपैयाँ रहेको थियो।

खुद्रामा भने सेतो मूलाको मूल्य प्रतिकिलो ५० रुपैयाँदेखि ७० रुपैयाँसम्ममा उपभोक्तालाई बिक्री भइरहेको व्यापारी बताउँछन्। मूलाको सिजन सुरु भएसँगै मूलाको भाउ अझ घट्ने अनुमान व्यवसायीहरुको छ। काठमाडौं उपत्यकाको फर्पिङ, भक्तपुर, नुवाकोटको ककनी, टिस्टुङ, पालुङ, धादिङ लगायतका क्षेत्रहरुबाट मूला भित्रिरहेको श्रेष्ठले बताए।

कम उत्पादनले माग धान्न नसक्ने अवस्थामा मूलाको कारोबार मूल्य बढ्ने गरेको छ। यो वर्ष पनि लोकल सेतो मूलाको मूल्य जेठ र असार मध्यसम्म निकै बढेको थियो। यो समयमा थोकमा नै मूला किलोको ५५ रुपैयाँसम्म पुगेको थियो। साउनमा भने मूलाको मूल्य ओरालो लागेर औसतमा किलोको करिब १२ रुपैयाँसम्म झरेको थियो।

असोज लागेपछि भने मूलाको भाउ बढेर प्रतिकिलो औसतमा ३३ रुपैयाँ पुगेको थियो। कात्तिक पहिलो हप्तासम्म भाउ अझै बढेर प्रतिकिलो ४० रुपैयाँसम्म पुगेको समितिको तथ्यांकले देखाउँछ। मंसिरबाट भने मूलाको थोक बजारमा भाउ ओरालो लाग्दै गएको छ।