काठमाडौं। नेपाल धितोपत्र बोर्ड (सेबोन) ले बुक बिल्डिङ विधिबाट आइपीओ निष्कासनको तयारीमा रहेका सर्वोत्तम सिमेन्ट र रिलायन्स स्पिनिङ मिल्सको प्रक्रिया अघि बढाएको छ।

सेबोनले सोमबार दुवै कम्पनीलाई प्रारम्भिक प्रतिक्रिया दिएको छ। सेबोनले कम्पनीहरुलाई 'फर्स्ट कमेन्ट' दिएको हो, यो भनेको बोर्डले औंल्याएका विषय पूरा गरेलगत्तै कम्पनीहरुले आइपीओ जारीका लागि अन्तिम स्वीकृति माग गर्न सक्छन्। एक हिसाबले भन्दा यो सैद्धान्तिक स्वीकृति हो।

बोर्डले थप प्रष्टीकरण आवश्यक ठानेको खण्डमा कम्पनीहरुको फिल्ड भिजिट समेत गर्न सक्ने छ। सन्तुष्ट भएपछि कम्पनीहरुले बुक बिल्डिङ विधिबाट आइपीओ निष्कासनको अन्तिम अनुमति पाउनेछन्।

उद्योगी विष्णु न्यौपानेको सौरभ समूहअन्तर्गतको सर्वोत्तम सिमेन्ट र पवन गोल्याणको गोल्याण समूहअन्तर्गतको रिलायन्स स्पिनिङ मिल्स दुवै कम्पनी अहिले बुक बिल्डिङ विधिबाट प्राथमिक सेयर निष्कासनको तयारीमा छन्।

हाल सर्वोत्तम ६० लाख कित्ता प्राथमिक सेयर प्रिमियममा निष्कासन गर्ने योजनामा छ। त्यस्तै, रिलायन्स स्पिनिङ मिल्स १९ लाख २६ हजार कित्ता प्राथमिक सेयर निष्कासन गर्ने तयारीमा छ। जसमध्ये निष्कासन हुने कुल कित्ताको ४० प्रतिशत कित्ताका लागि योग्य संस्थागत लगानीकर्ताले बोलकबोल गर्नेछन्। सोही बराबरको कित्ता संख्या निष्काशन गर्ने अनुमति कम्पनीहरुले मागेका हुन्। 

यी दुवैको सेयर निष्काशन तथा बिक्रीका लागि नियुक्त प्रमुख प्रबन्धक ग्लोबल आइएमई क्यापिटल नै रहेको छ। सर्वोत्तममा एनआईबीएल र प्रभु क्यापिटल पनि सह-बिक्री प्रबन्धकमा छन्। रिलायन्स स्पिनिङको ग्लोबल आइएमई क्यापिटल मात्रै हो। बिक्री प्रबन्धकले गरेको कम्पनीको वित्तीय तथा बजार मूल्यांकनबाट यी दुई कम्पनीमध्ये रियलायन्सको सेयर मूल्य अधिक हुने देखाइएको छ।

बिक्री प्रबन्धक ग्लोबल आइएमई क्यापिटलले रिलायन्सको प्रतिकित्ता सेयर मूल्य ७२९.९८ रुपैयाँ मूल्या‌ंकन गरेको छ। त्यस्तै, सर्वोत्तमको भने रिलायन्सको भन्दा १०२.९२ रुपैयाँले कम अर्थात् ६२७.०६ रुपैयाँ हुने प्रक्षेपण गरेको हो।

प्रारम्भिक विवरण पत्रमा ७०१ रुपैयाँ अपेक्षा गरेको रिलायन्सको सम्पूर्ण कित्ता योग्य संस्थागत लगानीकर्ता (क्युआइआई) ले ६०८ रुपैयाँमा खरिद गर्ने आशय दिएका छन्। यस्तै, ५०१ रुपैयाँ प्रतिकित्ता अपेक्षा गरेको सर्वोत्तमको सेयर भने सोही मूल्यमा योग्य संस्थागत लगानीकर्ताहरुले किन्ने भएका हुन्।

क्युआइआईहरुले उनीहरुका लागि कम्पनीले छुट्याएको सम्पूर्ण कित्ता खरिदमा लागि राजी भएपछि बुक बिल्डिङ विधिबाट सेयर निष्काशन गर्न रिलायन्स र सर्वोत्तमले धितोपत्र बोर्डसमक्ष निवेदन बुझाएका छन्। दुवै कम्पनीले योग्य संस्थागत लगानीकर्ताहरुलाई आइपीओ निष्काशन गर्न असार ३० गते बोर्डमा आवेदन दिएका हुन्।  

धितोपत्र बोर्डसमक्ष रिलायन्सले ७ लाख ७० हजार कित्ता र सर्वोत्तमले २४ लाख कित्ता निष्काशनको अनुमति सहित निवेदन दिएका हुन्।  

बाँकी रहेको ६० प्रतिशत कित्ता सर्वसाधारणलाई जारी गरिनेछ। सर्वसाधारणका लागि निष्कासन गरिने सेयर संस्थागत लगानीकर्ताको बोलकबोल प्रक्रियामार्फत तय हुने 'कट अफ' मूल्यको १० प्रतिशत छुटमा जारी हुनेछ।