काठमाडौं। नेपाल उद्योग परिसंघ (सीएनआइ), टिम भेन्चर्स, नेपाली युवा उद्यमी मञ्च (सीएनआइवाइइएफ) र स्टार्टअप रेसो इन्डियाले नेपालमा उच्च सम्भावित प्राविधिक स्टार्टअप तथा एसएमईका लागि ग्रोथएक्स एभरेष्ट एक्सेलेटर कार्यक्रम सुरु गर्ने भएको छ। 

यस कार्यक्रमको उद्देश्य नेपालमा प्राविधिक उद्यमशीलताको नेतृत्वमा आर्थिक विकास ल्याउने उनीहरुले बताए। 

ग्रोथएक्स एभरेष्ट एक हाइब्रिड संरचित एक्सेलेटर कार्यक्रम हो। यसमा नेपालका हाइ-टेक स्टार्अपलाई स्केल अप गर्न, विश्वव्यापी रुपमा विस्तार गर्न तथा फण्ड रेज गर्न सक्षम बनाइने छ। यसमा १६ देखि २० हप्ता लामो कार्यक्रममा नेपालबाट आफ्ना उद्यम सञ्चालन गर्ने संस्थापकहरूलाई सहभागी गराइने बताइएको छ। 

यसले नेपाली स्टार्टअपहरुलाई अन्तर्राष्ट्रिय रुपमा ख्याती प्राप्त उद्योगी, विशेषज्ञ, सफल संस्थापक र लगानीकर्ताहरूबाट सल्लाह मिल्नेछ। साथै नयाँ उद्योग स्थापना तथा अन्तर्राष्ट्रिय नेटवर्कका लागि मद्दत गर्ने उनीहरुले बताए। यसले नेपालमा एक सम्पन्न प्राविधिक स्टार्टअप इकोसिस्टम निर्माण गर्न मद्दत पुग्ने आयोजकहरुको विश्वास छ । 

स्टार्टअप रेसोले भारतमा बुट क्याम्प र एक्सेलेटर कार्यक्रममार्फत विगत नौ वर्षमा ८०० भन्दा बढी स्टार्टअपहरूलाई लगानी गर्दै १२ हजार बढीलाई प्रत्यक्ष रुपमा रोजगारी सिर्जनामा सहयोग गरेको छ। यस्तै ४० भन्दा बढी एक्सेलेटर स्थापना, नवीनतम रोजगारी सिर्जनामा सहयोग गर्दै १ करोड ३० लाख डलर बराबर राजश्व, अनुदान र प्रयोजनामा सहयोग पुर्‍याएको छ।

सहकार्य सम्झौता गरेपछि टिम भेन्चर्सका सीइओ तथा संस्थापक तेन्जिन सोनम गोन्सारले नेपालमा स्टार्टअपहरुको व्यवसायलाई माथि उठाउन प्रोत्साहन एवं सहयोग गर्न सिएनआइ, सिएनआइवाइइएफ जस्ता साझेदार पाएको भन्दै खुसी व्यक्त गरे। 

‘एक लगानीकर्ताको रूपमा हाम्रो वास्तविक चुनौती हाम्रो पहिलो चेक जारी गरेपछि सुरु हुन्छ,' उनले भने, ‘कम्पनीहरूलाई तिनीहरूको रणनीतिक पहलहरू कार्यान्वयन तथा तिनीहरूको सञ्चालन सुधार र सही बजार पहुँच बढ्दो व्यापारको पूर्व सर्तहरू हुन्। एकैपटक यी चुनौतीहरु हटाउन गाह्रो छ। यस पहलका साथ हामी स्टार्टअपहरुको व्यवसायलाई माथि उठाउन सहयोग गर्नेछौं ।’

ग्रोथएक्स एभरेष्ट नेपालभित्र चलिरहेका विद्यमान एक्सेलेटर कार्यक्रमहरू भन्दा फरक पहल भएको नेपाल उद्योग परिसंघ युवा उद्यमी मञ्चकी अध्यक्ष प्राची अग्रवालले बताइन्। यो कार्यक्रम क्रस बोर्डर मेन्टरशिप, नेटवर्किङ र विस्तारमा केन्द्रित रहेको उनले थपिन्। 

त्यस्तै, स्टार्टअप रेसोका संस्थापक तथा सीइओ अजय रामसुब्रमण्यमले भने, ‘दक्षिणमा धेरै उदीयमान बजारहरू छन्। कम्तिमा एउटा सहरको जनसंख्या ६ अर्ब बढी छ। यो जहाँ नवप्रवर्तन फस्टाउन गइरहेको छ। आर्थिक विकासको नेतृत्व पहिलो पुस्ताका उद्यमीहरूले गर्नेछ। हामी यहाँ नेपालमा आउन पाउँदा उत्साहित छौं। बजार सान्दर्भिक स्टार्टअप कार्यक्रमहरू निर्माण गर्न समान विचारधारा भएका संस्थाहरूसँग साझेदारी गर्छौं।’